‘खलंगामा हमला’ अंग्रेजीमा

  • Get News Alerts

नेपाली पाठकमाझ लोकप्रिय कृतिहरुलाई अंग्रेजी घेरामा लैजाने क्रमको सिलसिलामा पब्लिकेशन्स नेपालयले मदन पुरस्कार विजेता ‘खलंगामा हमला’को नेपाली अनुवाद ‘जुम्ला- एउटा नर्सको कथा’ सार्वजनिक गरेको छ।
 
पुस्तक जुम्लास्थित कर्णाली सामुदायिक पुस्तकालय तथा श्रोत केन्द्रलाई राधा पौडेलले हस्तान्तरण गरेसँगै विमोचित भएको छ। पुस्तकालयका कोषाध्यक्ष रत्नप्रसाद उपाध्यायलाई पुस्तक प्रदान गरिएको थियो।
 
दस वर्षे द्वन्द्वलाई प्रत्येक नेपालीले फरक ढंगमा भोगेका छन्। कोही दिनरात द्वन्द्वको भुक्तमान भएर बाँचे। कोही यसैमा सरिक भएर हिँडे। कोही प्रत्यक्षदर्शी बने। यी फरक भोगाइका आ–आफ्नै फरक अनुभूति थिए।
 
यस्तै फरक अनुभूतिले दिएको एउटा फरक कथा थियो ‘खलंगामा हमला’।
 
पेसाले नर्स पौडेलले जुम्लामा रहँदा द्वन्द्वको कटु अनुभव संगाल्नु प¥यो। सुरक्षित मातृत्व कार्यक्रमका निम्ति त्यहाँ खटिएकी उनले विस्तारित बसाइकै क्रममा माओवादीको खलंगा हमला झेलेकी थिइन्। यसरी त्यस रात आफैं सशस्त्र द्वन्द्वको भुक्तमान हुनु पर्दाको चित्रण उनको पुस्तकमा छ।
 
भरतपुर अस्पतालमा चार वर्ष ‘एनेस्थेटिक असिस्टेन्ट’को काम गरेकी राधा स्थायी सरकारी जागिर छाडेर सुरक्षित मातृत्व कार्यक्रमका लागि जुम्ला गएकी थिइन्। माओवादी द्वन्द्वको उत्कर्षमा जुम्ला बसेकी राधाले त्यसबेला दुर्गम बसाइका अप्ठ्यारा र त्रासलाई नजिकबाट भोगेकी छन्। २०५९ कात्तिक २८ गते प्रत्यक्ष देखेको खलंगा हमलाचाहिँ उनको जीवनमा भुल्नै नसकिने घटना बन्न पुग्यो। दुर्गम क्षेत्रमा स्वास्थ्य सेवाको दारुण अवस्था चित्रण गर्दागर्दै त्यही भयावह दिनको केन्द्रमा पुस्तक तयार पारिएको छ। द्वन्द्वका बेलामा अस्तव्यस्त समाज, मानवीय संवेदना र माओवादी तथा सुरक्षा निकायबीच चेपिएर काम गर्दाको कहालीलाग्दो अनुभूति उनको पुस्तकमा समेटिएका छन्।
 
उनले किताबमा लेखेकी छन्, ‘सिडिओ अफिसदेखि हामी बस्ने घरसम्म मान्छेको हुल थियो। सलह बगेजस्तो देखिन्थ्यो माओवादी फौज। एक लहर हुर्र अघि बढ्थ्यो, अर्को लहर पछ्याउँदै आउँथ्यो। त्यसको पछाडि फेरि अर्को लहर। चारैतिर गोली र बमको आवाज मात्र सुनिँदै थियो। गोली चल्दा बन्दुकबाट छुट्ने आगोका झिल्काले मेरा आँखा तिरमिर भए।’
 
यो किताबले लडाइँको मानवीय पक्ष झल्काउँछ।
 
कर्णालीका स्वास्थ्यगत तथा सामाजिक समस्यालाई पनि गहिरोसँग केलाएको छ यो किताबले।
 
राधा लेख्छिन्, ‘सुत्केरी गराउँदा साल अड्केर धेरै रगत बगेछ। यस्तोमा पाठेघर खुम्चाएर रगत बग्न कम हुने औषधी दिनुपर्छ। रगतसम्म दिन पाए पनि बिरामीलाई बचाउन सकिन्छ। त्यहाँ बिरामीलाई चाहिने जगेडा रगत थियो, न अपरेसन कोठा। न इन्जेक्सन, न औषधी। बजारका निजी औषधि पसलमा पाइन्छ कि भनेर मान्छे दौडाएँ। पाइएन। अब बिरामीलाई सुर्खेत वा नेपालगन्ज लग्नुको विकल्प देखिनँ। तर, कुरुवासँग पैसा थिएन।’
 
यसैका निम्ति मदन पुरस्कार विजेता पौडेल खलंगा हमलापछि पनि निरन्तर जुम्लामै रहेर सामाजिक काममा संलग्न छिन्। उनलाई अमेरिकाको युनिभर्सिटी अफ स्यानडियागोले ‘वुमन पिसमेकर– २०१२’ र राष्ट्रसंघीय विकास कार्यक्रम (युएनडिपी) ले ‘एन–पिस अवार्ड २०१२’ बाट सम्मानित गरिसकेको छ।
 
‘मेरो पुस्तक मन पराइदिनुभएकामा म पाठकहरुप्रति हार्दिक आभार प्रकट गर्छु,’ राधा भन्छिन्, ‘अंग्रेजी संस्करणमा समेत आएपछि अब कर्णालीका कथा– व्यथा विश्वभरि फैलिएका पाठकहरुसम्म पुग्ने अपेक्षा गरेकी छु।’
 
राधाको ‘खलंगामा हमला’ २०७० जेठ ९ गते विमोचन भएको थियो भने यसको अंग्रेजी संस्करण ‘जुम्ला- एउटा नर्सको कथा’ लाई जुम्लास्थित कर्णाली सामुदायिक पुस्तकालय तथा श्रोत केन्द्रमा सार्वजनिक गरिएको थियो। यो पुस्तक हाल बजारमा उपलब्ध छ।

प्रतिकृया दिनुहोस